كرسي الاعتراف

السلام عليكم

وعليكم السلام ورحمه الله وبركاته

ازيك دكتور صافي اخيرا حد قعد علي الكرسي وهيتهري اسئلة بقي وكده

ايه ده انتى شكلك ناويالى نيه صعبه قوى بس مش مشكله اتفضلى


1مين مثلك الاعلي في مهنة الطب؟

اكيد الدكتور مجدى يعقوب الواحد نفسه يكون دكتور متميز يفيد الاسلام بعلمه ويتباهى الرسول به يوم القبامه ويقول هذا من امتى ولما يقف قدام ربنا يوم الحساب يكون قدر يعمل بالعلم الى ربنا ادهولى وربنا يوفقنى اكون عند حسن ظن ربى بى


2هي خطيبتك كلية ايه؟في سنة كام؟ايه رأيهافي كليتنا؟

هو سؤال خاص حبيتين ومحرج 3 حبات بس علشان بوسى هى الى بتسال انا حجاوب طبعا
على قد ماقدر هلى ليها راى جميل جدا فى كليتنا
هى بتحب اى كليه اكون انا فيها على الرغم من انها بتخاف خالص من منظر الدم وسعات كتير بحاول اخوفها عن طريق المناظر المرعبه هى رقيقه جدا ومش قد الكليه بتاعتنا (كليتنا عايزه قلب جامد) بس مش حقدر اقول هى فى كليه ايه معلش

3موقف اتمنيت ان الوقت يقف عنده وميعديش؟

السنه ده قبل امتحان الميكر فى ليله المتحان لما جالى خبر وفاه والدى من حد من اصحابى
حسيت الدنيا بتلف بيا لانى مكنتش متخيل ده خالص انى ووالدى يموت وانا مش جمبه وقبل ما يوفيلى بوعده ليا انه يحضر فرحى انا بجد اتمنيت ان الدنيا تقف ومتتحركش واموت انا ولا يموت وادى الله يرحمه ويسكنه فسيح جناته

4هتعزم الدفعة علي الفرح ولا اصحابك بس؟

المنى منايا انى اعزم الدفعه كلها ولاد وبنات واننا كلنا نفرح مع بعض
بس لو عزمتك حتيجى ؟؟؟؟؟

5ايه اكتر حاجة عملتها وندمت عليها؟

الحمد لله عمرى ماعملت حاجه ممكن اكون ندمت عليها الا انى لو فى يوم عرفت انى عصيت ربنا من غير ما استغفره واتوب اليه اكيد حكون فى اشد الندم

كفاية كده المرة دي انا اسئألتي سهلة خالص أهو

انا تحت امر هيئه القضاء العالى

بعد إذنكم يا جماعة
عايزة أقول comment
ولو إني خلاص كرهت الكلمة دي
عجبني جدا لما دخلت احدى المنتديات وكان في مناقشات الزملاء ومناقشات الزميلات
انا عارفة ان الاسئلة والاجابات في اطار الادب وان المنتدى مش ديني علشان ينفذ فكرة زي دي
لكن قلت كده لما توسمت في تعليقاتكم كلكم انكم محافظين على الدين
والدين حرم الاختلاط سواء جسديا
ودا غصب عننا في الكلية وفي المواصلات او
في مناقشات
حفاظا على قلب الانسان وعلى خواطره
متزعلوش مني لكن " المؤمنون والمؤمنات بعضهم أولياء بعض يأمرون بالمعروف وينهون عن المنكر"
والله أعلم
وربنا يوفقنا جميعااااااااااااااااااااااااااااا

السلام عليكم ..

تحية إلى الأخت " سجدة قلب "

لكن أنا مافهمتش إيه المقصود بمشاركة حضرتك السابقة ؟؟

وعليكم السلام ورحمة الله وبركاته
حياكم الله د يحيى
قصدي ببساطة ان الزملاء يتكلموا لوحدهم والزميلات لوحدهم

السلام عليكم ..

أشكر حضرتك على التنبيه .. ده أولا ..

ثانيا : الكلام اللي حضرتك ذكرتيه جميل لكن مكانه مش في الموضوع ده ( عشان الموضوع مايخرجش بره السياق و يتقفل الموضوع )
ثالثا : هذا الطلب من اختصاص إدارة الموقع .. هي اللي تشوف اللي فيه المصلحة ..
رابعا : و في عجالة .. الاختلاط اللي في الموقع هنا مافيهوش أي مخالفة شرعية (في نظري - و أنا أحفظ القرآن كاملا و لله الحمد ) و بعدين شوفي حضرتك المواقع الإسلامية أو الدينية فيها اختلاط في المشاركات و تبادل الآراء والمصالح العامة .. و طالما إن الموضوع مافيهوش جرح للحياء أو للعادات فمافيش مشاكل ، و الصحابيات - رضوان الله عليهن - كانوا يدرسون العلم للصحابة ، و كانوا يخرجوا للجهاد مع المجاهدين (لمداواة الجرحى و إعداد الطعام ... ) فإيه المشكلة ؟؟؟؟

و بعدين في الموقع هنا قسم خاص للزميلات و فيه مواضيع خاصة بهن ..و الزميلة اللي شايفة إنه فيه مشكلة في الاختلاط ممكن تتواصل مع زميلاتها في القسم المخصص لهن .. و بلاش الأقسام التانية ..

و شكرا ليكي مرة أخرى على تنبيهم و اهتمامك

وعليكم السلام
اولا: لا شكر على واجب
ثانيا : اسفة جدا لم أقصد الخروج بره السياق ولا قفل الموضوع ,اللي مهتم يتفضل يكمل ويتجاهل كلامي مفيش مشاكل لكن انا كتبته هنا علشان انصح حد معين وانا قلتلها بس محبتش النصيحة تخصها لوحدها
ثالثا:زي ما قلت دا مكنش طلب للادارة دا كان نصيحة لصحبتي
رابعا : مش هدخل في تفاصيل المخالفة الشرعية التي اراها_على جهلي_ فين بس كان نفسي ان الموقع دا يكون علمي بس وساعتها الاختلاط للافادة والاستفادة مفيش مانع
غير كده .....
المواقع الاسلامية الصح مفيهاش اختلاط مثال واحد " موقع منهج السلفي "
وبالنسبة للصحابيات رضي الله عنهم كلام جميل جدا
لكن كرسي الاعتراف دا علم ولا جهاد ؟؟!!
اكرر اسفي وهذه اخر مشاركة لي في هذا الموضوع
يارب اكون وضحت وجهة نظري
واسال الله ان يزقك شفاعة القران

222222222222

333333333333333333333

44444444444444

555555555555555

د- ميدمنيا

اكيد كلنا وخصوصا الاعضاء الجدد نفسهم يعرفوا اكتر عنه

لو ينفع طبعا

يا خبر


انا قلت قبل كده اني برفض الكرسي لاسباب اني مش هقدر اجاوب معظم الاسئله

لكن حاضر

بس ارجو بلاش اسئله شخصيه .. انت في سنه كام .. عندك كام اخ ...وما الى ذلك

واهلا بالاسئله

اهلا بيك د.ميدمينيا
اولا شكرا اوى على موافقة حضرتك على الكرسى
ثانيا بقى
انا بقى هكون اول واحدة اسأل لانى اصلا كنت هموووت واختار حضرتك بس خفت ترفض
اهى دكتورة بلازما سهلت الموضوع

رغايه انا صح
المهم الاسئلة


*سؤال يطرح نفسه ليه حضرتك مش حابب حد يعرف عنك اى شئ ؟؟
(مع العلم انى بحترم الشئ ده فحضرتك جدا)

**فكرة ان حضرتك تعمل منتدى يجمعنا ويكون مكان لينا اول ماجتلك بدأت فتنفيذها ولا اخدت وقت لحد ماقدرت تاخد خطوة ايجابيه فالتنفيذ؟؟


***ياترى حاسس ان اللى اتمنيته من المنتدى بيتحقق ولا ؟؟وايه رأى حضرتك فالمنتدى لحد الوقتى؟؟؟؟(تقريبا نفس السؤال)

****ليه حضرتك مش متواجد فالمواضيع بصفة دائمة او مش دائمة يعنى بس مش بتشارك الا قليل اوى يعنى اغلب ردود حضرتك فمواضيع الادارة الاقتراحات الشكاوى كده يعنى
قليل اوى لما بلاقى رد لحضرتك فموضوع تانى ؟؟

*****اخر سؤال بقى
لو حصل بعد الشر يعنى وحضرتك اضطريت تسيب المنتدى لظروف ما
مين ممكن ترشحه لمكان حضرتك ؟؟؟
حاسه ان السؤال غبى شويه بس اهو اللى جه فبالى



اتمنى ماكونش تقلت على حضرتك

السلام عليكم يا دكتور

انا اسفة مكنتش اعرف والله ان حضرتك رفضت قبل كدة
وميرسي جدا ان حضرتك وافقت على الكرسي

الاسئلة بقا

* ازاي جت لحضرتك فكرة المنتدى من الاول؟
* تفتكر في عيوب فالمنتدى دلوقتي ؟ ولو موجودة ايه هي ؟
* ايه كان هدف حضرتك من المنتدى ؟
* هل في وقت حضرتك ندمت انك انشات المنتدى ؟ ولو في امتى؟
* ايه اصعب وقت عدى على المنتدى ؟ وايه احسن وقت؟

مش عارفه ليه هما شبه اسالة الثانويه العامة

يارب تكون اساله مش غتته

وشكرا لحضرتك مرة تانيه

nadeen كتب:اهلا بيك د.ميدمينيا
اولا شكرا اوى على موافقة حضرتك على الكرسى
ثانيا بقى
انا بقى هكون اول واحدة اسأل لانى اصلا كنت هموووت واختار حضرتك بس خفت ترفض
اهى دكتورة بلازما سهلت الموضوع

اهلا د نادين

العفو على ايه يعني

nadeen كتب:

*سؤال يطرح نفسه ليه حضرتك مش حابب حد يعرف عنك اى شئ ؟؟
(مع العلم انى بحترم الشئ ده فحضرتك جدا)

جاوبت على السؤال ده كتير
وشكرا على احترامك للشئ ده فيا

الفكره مش عاوز معرفه حد ليا يمنع او يشجع حد على دخول المنتدى

بمعنى نادين لو عملت منتدى اكيد اللي بيحبوها هيدخلوا المنتدى واكيد اللي مش بيحبوها مش هيدخلوا

ده غير ان هيبقى اللفظ الدارج على المنتدى منتدى نادين

وده اللي مش عايزه لان انا عامل منتدى عام لكل طلبه طب المنيا و مش عاوز حد يخليه منتدى شخصي

nadeen كتب:
**فكرة ان حضرتك تعمل منتدى يجمعنا ويكون مكان لينا اول ماجتلك بدأت فتنفيذها ولا اخدت وقت لحد ماقدرت تاخد خطوة ايجابيه فالتنفيذ؟؟

الفكره اول ماجتلي بدأتها على طول وطبعا انا لاخبره في النت او الكمبيوتر فكان لازم ادور على اسهل الطرق

واسهل الطرق المنتدى المجاني اللي بالمناسبه معنى انه مجاني مش ان الاعضاء مابيدفعوش فلوس

لا ده معناه ان انا مش هدفع فلوس

وجربت كذا شركه للمنتديات المجانيه وعملت كذا منتدى لحد مارسيت على المنتدى ده

يعني بدأت في تنفيذ الفكره على طول لكن التأخير كان لجهلي مش اكتر بالطريقه
والباقي في ردي على بلازما

nadeen كتب:

***ياترى حاسس ان اللى اتمنيته من المنتدى بيتحقق ولا ؟؟وايه رأى حضرتك فالمنتدى لحد الوقتى؟؟؟؟(تقريبا نفس السؤال)

على فكره دول سؤالين مش زي بعض

اللي اتمنيته من المنتدى بدا يتحقق لكن ماتحققش

ولفتره كنت بدأت ايأس لكن منتدى سنه تالته اللي هيكونوا في رابعه ان شاء الله بعد عني اليأس ده

ورايي في المنتدى الوقت ده انه كويس شغال بدا يتحرك و يفيد الناس

بس انا اللي كنت بتمناه

مكان يجمع كل طلبه طب المنيا دكاترتها
مكان يفيد الكل من غير ماتحتاج تدور في مكان تاني
مكان يخلي الغايب او البعيد يعرف ويتابع كليته وكمان السكشن او الراوند بتاعه من بيته
مكان يجمع كل التحديدات والتلخيصات المهمه اللي انا وانتي يا د نادين بنتعب على مانلاقيها
واللي يمكن بنكتشفها بعد ما الامتحانات تخلص

nadeen كتب:

****ليه حضرتك مش متواجد فالمواضيع بصفة دائمة او مش دائمة يعنى بس مش بتشارك الا قليل اوى يعنى اغلب ردود حضرتك فمواضيع الادارة الاقتراحات الشكاوى كده يعنى
قليل اوى لما بلاقى رد لحضرتك فموضوع تانى ؟؟

بالنسبه للتواجد انا ولله الحمد متواجد شبه يومي اما المشاركه فهيا اللي قلت فعلا لاسباب كتير

منها اني لو عضو ومدير المنتدى بيشارك في كل موضوع انا هتخنق بصراحه
ومنها اني مش ببقى في موود يخليني ارد واتكلم انما لو في شكوى او مشكله او اقتراح ده بيضطرني اني ارد
وكمان لأن ملاحظاتي انا دون عن غيري بيعتبرها البعض تحذيرات او تهديدات وده مش حابه انه يحصل لاني عمري مابحذر او بهدد غير اللي يخرج عن النص

nadeen كتب:

*****اخر سؤال بقى
لو حصل بعد الشر يعنى وحضرتك اضطريت تسيب المنتدى لظروف ما
مين ممكن ترشحه لمكان حضرتك ؟؟؟

اللي ارشحه مدي المنتدى كتير وبدون ترتيب وكلهم يسدوا واحسن مني كمان

بريزون بريك بيدو د مينا دينجروس خيري ليند نونيم د منه لايت موون على مرسي محمود ان كوين بلازما احمد قمر

nadeen كتب:
اتمنى ماكونش تقلت على حضرتك

اهو تقلتي ولا ماتقلتيش اديني استحملتك وخلاص

nadeen كتب:

رغايه انا صح

مظنش ان في رغاي اكتر مني


مستني بقيه اسئلتك

plasma كتب:السلام عليكم يا دكتور

انا اسفة مكنتش اعرف والله ان حضرتك رفضت قبل كدة
وميرسي جدا ان حضرتك وافقت على الكرسي

وعليكم السلام يا دكتوره

لا عادي ولا يهمك

plasma كتب:

* ازاي جت لحضرتك فكرة المنتدى من الاول؟

انا جاوبت على السؤال ده مع دكتوره نادين لكن هعمل تعديل وهجيبه هنا

باختصار
الفكره جاتلي من كام منتدى طبي عاملين اقسام لكل كليات الطب في الجمهوريه ماعدا المنيا وده استفزني جدا جدا
ده غير ان كان زمايلنا المغتربين في كليات الطب بره المنيا كانوا بيعرفوا اخبار كليتهم من منتديات كلياتهم
ده غير اللي قلته من حيث الورق والتحديدات والكلام ده كله اللي ماكناش بنسمع عنه

فحاولت اعمل مكان يجمعنا كلنا نفيد بعضنا ونساعد الكل

plasma كتب:
* تفتكر في عيوب فالمنتدى دلوقتي ؟ ولو موجودة ايه هي ؟

عيوب المنتدى نوعين

عيوب تخص المنتدى نفسه كبرمجه من حيثيات بسيطه طريقه الكتابه و الابتسامات
الاعلانات المتواجده بصفه دايمه
مش كل الاقسام شغاله ومش كل الاقسام مغطيه كل الاهتمامات

عيوب تخص المنتدى كمعنى
ممكن يؤذي حد وهو مش واخد باله --- ممكن يؤدي الى اختلاط اوفر ملوش داعي


العيوب كتير د بلازما لكن المميزات تغطي

plasma كتب:
* ايه كان هدف حضرتك من المنتدى ؟

هدفي من المنتدى هي اساس الفكره جت منين وجاوبتها باستفاضه معاكي ومع د نادين وبكده هبقى بكرر نفس الكلام

plasma كتب:
* هل في وقت حضرتك ندمت انك انشات المنتدى ؟ ولو في امتى؟

اه اوقات مش وقت واحد

مره عشان في حد تضرر من المنتدى في شخصه
ومره عشان في ناس زعلت مني لما عرفوا ان انا مدير المنتدى
ومره عشان في بيانات اعضاء خرجت لأعضاء تانيه غصب عني
ومره لما لقيت المنتدى مش جايب همه ومش بيحقق الهدف اللي اتعمل عشانه

plasma كتب:
* ايه اصعب وقت عدى على المنتدى ؟ وايه احسن وقت؟

مش قادر اقول بصراحه اصعب واحسن وقت

لكن احسن وقت عدى عليه في رأيي الفتره قبل امتحانات اخر السنه السنادي والروعه والجمال اللي كان في منتدى سنه تالته ده غير الوقت اللي كانوا فيه متواجدين دينجروس ولايت مون ونونيم وخيري ليجند وعلى مرسي

اصعب وقت لما اختفوا كل دول من حوالينا واكيد غيابهم اثر فينا

اصعب وقت كان بدايه المنتدى وازاي كنا بنحاول نشغله

اصعب وقت لما مشكله تحصل مع حد من الاعضاء وافشل اني احلها

plasma كتب:
مش عارفه ليه هما شبه اسالة الثانويه العامة

يارب تكون اساله مش غتته

وشكرا لحضرتك مرة تانيه

بالعكس يا دكتوره كانت اسئله سهله جدا

ومستني الاسئله اللي جايه

اشكرك د.ميد مينيا على الرد

بصراحة مش عارفة اكمل اسئلة لان كل ماجى اسأل حاسه انه فى حاجات مقيدانى
بس انا هكمل بقى وامرى لله وحضرتك السؤال اللى مش ينفع ترد عليه كأنه لما يكن بالمره
يعنى حضرتك تمر عليه مرور الكرام


نكمل اسئلة

*مش هقولك اكتر حد بيضايقك فالمنتدى لانه فيها احراج انك تقول اسم او كده
بس أيه اكتر حاجة ممكن تضايقك من عضو فالمنتدى ؟؟
وايه طبعا اكتر حاجة تشدك او تخليك تحترم عضو فالمنتدى؟؟

**اكتر حاجة فميدمينيا بتشوفها مش حلوة فيه بمعنى عيب نفسك تقضى عليه ؟؟
ومش لازم نسأل عن الوحش بس
ايه اكتر صفة بتشد الناس لحضرتك؟؟؟؟؟

***ياترى عدى على حضرتك قبل كده موقف حصل قدامك لشخص ما مثلا صديق واتمنيت لو انك تبقى مكانه ؟؟؟؟؟

****ايه رأى حضرتك فكليتنا ...لو الزمن رجع بيك لورا هتدخلها تانى؟؟؟

*****نختم بحاجة سهله نوعا ما

prisonbreak
drbedo
khairylegend
plasma
menna
ولو ينفع يعنى معاهم nadeen

كلمة من حضرتك لكل واحد منهم....؟؟؟؟؟؟


كفايا بقى كده عشان انا حاسه نفسى انى تقلت كتييييييير على حضرتك
بس زى ماقلت لحضرتك اللى مش ينفع ترد عليه كأنه لم يكن

nadeen كتب:

*مش هقولك اكتر حد بيضايقك فالمنتدى لانه فيها احراج انك تقول اسم او كده
بس أيه اكتر حاجة ممكن تضايقك من عضو فالمنتدى ؟؟
وايه طبعا اكتر حاجة تشدك او تخليك تحترم عضو فالمنتدى؟؟

حاجات كتير بتضايقني من الاعضاء زي مابتضايقكوا

عضو يستخدم الفاظ مش كويسيه ..عضو بيشتم او يتكلم وحش على زمايله او دكاترته...عضو متصنع وراسم شخصيه غير شخصيته...عضو يتريق وهو مابيصلحش حاجه

اما بقى اكتر عضو مش بحبه العضو اللي بيقولي ( حضرتك )

اما العضو اللي يشدني

العضو الخدوم اللي يخدم زمايله لوجه الله ويحترم زمايله ويبقى محبوب من كل زمايله في المنتدى مشاركاته فعاله مش مجرد ردود شكر انا بحب جدا اللي يعقب على موضوع براي بمناقشه فكرة الموضوع باعتراضه على الموضوع

اما اكتر واحد بحبه على الاطلاق اللي يدخل منتدانا ويقول عايز حد يجبلي كذا ده بحترمه جدا واللي بحترمه اكتر اللي يجبله الحاجه دي
اكيد ده عضو اي حد يحترمه

nadeen كتب:

**اكتر حاجة فميدمينيا بتشوفها مش حلوة فيه بمعنى عيب نفسك تقضى عليه ؟؟
ومش لازم نسأل عن الوحش بس
ايه اكتر صفة بتشد الناس لحضرتك؟؟؟؟؟

اكتر عيب فيا اني بثق في اللي قدامي بسرعه وكمان في اوقات كتير بكون سئ الظن و كمان عصبي

اكتر صفه بتشد الناس ليا ...... ما أظنش اني في حد بيتشدلي اصلا

الله اعلم بجد مش عارف

nadeen كتب:

***ياترى عدى على حضرتك قبل كده موقف حصل قدامك لشخص ما مثلا صديق واتمنيت لو انك تبقى مكانه ؟؟؟؟؟

لا بصراحه مش فاكر موقف بعينه ولا شخص بعينه

انما اي طفل بيلعب في الشارع مش شايل هم للدنيا ولسه ميعرفش يعني ايه مسؤليه اكيد بتمنى اكون مكانه

nadeen كتب:

****ايه رأى حضرتك فكليتنا ...لو الزمن رجع بيك لورا هتدخلها تانى؟؟؟

كليتنا كمنيا ولا كليتنا كطب

لانها تفرق كتير

رأيي في كليتنا كطب انها كليه ممتازه وتخصص ممتاز بالعكس احنا من قلائل الكليات اللي بتشتغل بعد التخرج باللي درسوه في الكليه
وفكره انك تساهم في علاج مرض او تخفيف الم اي حد يتمناها وده اللي المفروض على اي طالب طب في هدفه من الوظيفه دي
صدقيني اللي بيخلص النيه لله في عمله ربنا بيكرمه اضعاف
الدكاتره بتتكسف تقول مش عارف على تشخيص مرض وادي في ادويه مالهاش لازمه
وبعدين مبدا التجاره لما دخل على الدكاتره افقد ثقه المرضى فينا

اما كليتنا كمنيا فأنا بقولها كفايه حسي بينا شويه

ليه مانكونش افضل كليه طب على مستوى الجمهوريه ليه

ليه الحركه بطيئه ليه التطوير بطئ

ليه تقديراتنا مش عاليه وليه غيرنا تقدرياته عاليه وهو مايفرقش علما عننا في حاجه
واحنا اللي بنتضرر بعد كده
ليه العملي في الدراسه مش واخد حقه

انا كطبيب يهمني مهارة ايدي ليه مش مهتميين بيها

ليه مفيش تطعيمات للطلبه زي الكليات التانيه

او بلاش زي غيرنا

ليه احنا مانسبقش

ليه مانكونش الاول ليه؟


ولو رجع بيا الزمن هدخل كليه الطب جامعه المنيا

nadeen كتب:

*****نختم بحاجة سهله نوعا ما

prisonbreak
drbedo
khairylegend
plasma
menna
ولو ينفع يعنى معاهم nadeen

كلمة من حضرتك لكل واحد منهم....؟؟؟؟؟؟

انتي بتقولي كلمه لكل واحد مش كلمه عن كل واحد
بقول للكل ربنا يوفقكم ويكرمكم

وبما انك ذكرتي اسامي نقول

نادين.......عملتي ايه في الامتحانات عشان المنتدى كان مضيع وقتك؟

بريزون بريك ...... فين افيهاتك وقفشاتك؟

بيدو....... من غيرك انت وبريزون كنت هتعب كتير

خيري ليجند.....وحشتني بجد

بلازما..... متخفيه ليه ؟

منه.......ياريت كل البنات زيك



واسئلي اللي نفسك يانادين واللي مش هقدر ارد عليه مش هرد

اشكر (حضرتك) عالرد يا دكتور

الامتحانات عدت على خير
هو بصراحة فى وفى
بس المنتدى مالوش دعوة خالص ولا عطلنى عن المذاكرة
ربنا يكرم

شكلك زعلان خالص من المنيا
بس ده الواقع فعلا

مره تانى بشكرك عالردود الجميلة والصريحة دى

ازيك يا بيدو حبيب قلبي

drbedo كتب:
1- فى ناس اصحابى بيقولولى انا اعرف ان طب المنيا بيدرسوا كويس
ايه رأيك ف الكلام ده ؟؟

بص انا مش عارف لكن هات حد جايب نفس تقديرك من كليه تانيه وناقشه هتلاقي نفسك احسن منه بكتير

فده راجع للتعليم اللي بناخده

ولا مذاكرتنا اللي في البيت مع نفسنا

الله اعلم

لكن فكره التقديرات انا متأكد منها اللي في مستواك تقديراته اعلى بكتير منك هنا

drbedo كتب:
2- ليه كل طلبة طب معظمهم على الرغم من الصعوبات الى بيواجهوها فى الكلية لما يتسألوا سؤال لو رجع بيك الزمن هتدخل الكلية

لأنهم عشقوا المهنه بغض النظر عن صعوبات الكليه

وانا بصراحه مش متخيل نفسي في كليه تاني ومش متخيل نفسي بشتغل شغل تاني

وضع و واقع عايش فيه وعاجبني بعيوبه ومش بفكر اغيره

وده وضع كتير مش انا بس

drbedo كتب:
3- تقول ايه للاعضاء الجدد والاعضاء اللى مش بيشاركوا ؟؟

بقول لكل الاعضاء اللي مش بيشاركوا

جرب وشارك قول رأيك اشكر واحد تعب في موضوع وانزل انت بموضوع جديد

هتحس بنوع من التواصل مع اصحابك جميل جدا وهتندم انك ماحاولتش تشارك قبل كده

drbedo كتب:
4- مين الاعضاء اللى اثرو فيك ومين العضو الى جذب انتباهك فى اوائل مشاركاته؟؟

الاعضاء اللي اثروا فيا هما كل الاعضاء اللي رشحتهم يبقوا مدير المنتدى

انما العضو اللي شد انتباهي في اوائل مشاركاته

ان كوين لخفه دمها

د منه لتدينها

drbedo كتب:
5- اخيرا وليس اخر ايه طموحتاك وافكارك الجديدة للمنتدى ؟؟

طموحاتي قلتها مع نادين يا بيدو

اما الافكار الجديده فمن الاعضاء دايما بحب اسمعها وبطبق اللي بقدر عليه

وماتحاولش تخليني احرق المفاجأه الجديده

drbedo كتب:

على ما اعتقد اسئلة سهلة

لا طبعا مش اسئله سهله بالعكس انت اكتر واحد عارف انها اسئله صعبه ومعظمها مالهاش اجابات اقدر اقولها

ومش مستني اسئلتك

هو سؤال واحد

ايه هي المفاجاة الجديدة؟؟؟؟؟؟؟؟؟؟؟؟؟؟؟؟؟؟؟؟؟

طيب خليها مفاجأه

ليه عاوزين تحرقوها

وبعدين انا واثق انها مش هتفرق مع معظم الاعضاء

لكن اهي حاجه والسلام

لما اعملها هاقولكم ان شاء الله